ភ្នំពេញ៖ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានឃាត់ចាប់រថយន្តក្រុង១គ្រឿងដឹកពងមាន់ជាង១៤ម៉ឺនគ្រាប់ ដោយគ្មានលិខិតអនុញ្ញាត ពីប្រទេសវៀតណាមមកលក់ចែកចាយនៅខេត្តបាត់ដំបង។

នាថ្ងៃទី ១៩ ខែកុម្ភៈ ឆ្នាំ ២០២៤ វេលាម៉ោង២២ និង២០នាទី ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានឃាត់ចាប់រថយន្ត១គ្រឿង ម៉ាកHYUNDAI ជាប្រភេទរថយន្តដឹកអ្នកដំណើរចំណុះ ៤៥កៅអី ស្លាកលេខភ្នំពេញ3A-3447 ពណ៌ក្រហម ដឹកស៊ុតសត្វមាន់ចំនួន៤៩២ដុំស្មើនឹង១៤៧៦០០គ្រាប់ ឃាត់នៅភូមិដំណាក់ធំ១ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។

មន្រ្តីជំនាញបានឱ្យដឹងថា រថយន្តខាងលើនេះបានដឹកស៊ុតសត្វមកពីប្រទេសវៀតណាម តាមច្រករបៀងស្រុកគិរីវង់ ខេត្តតាកែវ ឆ្ពោះមកលក់ចែកចាយនៅខេត្តបាត់ដំបង ដោយគ្មានលិខិតអនុញ្ញាតអ្វីទាំងអស់។

បច្ចុប្បន្ន ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បាននាំយកវត្ថុតាងនិងបទល្មើសខាងលើនេះ ទៅរក្សាទុកនៅអគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់៕